米高有話兒

義和昌工業皮帶

2009-04-06T11:20:00.001+08:00

業務性質：
批發及零售
產品及服務：
工業皮帶
連絡方式
九龍旺角登打士街1號地下
聯絡人：廖先生
電話：2384 8108
傳真：2332 6222
網址：www.ywcbelting.com

搬家了

2007-01-08T23:00:00.000+08:00

大屋搬細屋，唔見兩籮穀！
終於要同呢個 Google 業主講 byebye，因為我成日都 Login 唔到，Login 到嘅時候又 Create 唔到，Create 完又 Save 唔到，Save 左連自己都睇唔返自己Ｄ Post... 真係把幾火！所以，去其他地方暫避一下，遲Ｄ連家私（舊 post）都搬埋過去，個位請移欲步喇！

新地址：http://bearyung.netgenes.org

薩達姆之死

2007-01-04T09:38:00.000+08:00

薩達姆被判死刑後極速被處決，伊拉克政府而家Ｄ辦事效率真係好高！送貨去地獄既速度比 Fedex 仲要快，物流公司係時候學下野喇！

做野咁快手，無他既，成個政府都係反薩達姆既人，個個想佢死都黎唔切，公平審訊? 全世界我諗淨係得美國同埋伊拉克現任政府覺得「公平」！屠殺左 120 人，罪行真係好嚴重，但係用極速死刑黎做終結，個人認為唔係太正確。殺死 120 人極速問吊，咁布殊打南斯拉夫加阿庫汗加伊拉克入面殺死幾多人? 「錯殺」幾多村民? 點解冇人拉佢? 冇人將佢問吊? 丫！係喎，布殊係正義既化身，英雄嘛，佢打其他國家、殺死其他人就叫做幫佢地解放，果Ｄ國家如果還擊? 大鑊喇，美國打你你都敢還擊，你一定係收埋好多大殺傷力的武器，搵唔搵到唔緊要，就好似薩達姆咁，到佢死鬼左Ｄ美國佬都仲未搵到大殺傷力武器，原來最大殺傷力既武器，就係吊死薩達姆條麻繩，強而有力，連薩達姆都毫無頑抗之力。

打完伊拉克，我睇到既唔係伊拉克解放，而係美國經濟再次起飛！通訊、道路、房屋、基建等既工程，幫左美國好大忙！好多大企業都係靠呢Ｄ整靚份周年報告，而呢Ｄ大企業既股東，又有幾多係白宮既人呢?

哦！我明喇！原來美國冇錢，所以先去打人。咦，咁似樓下班死飛仔既，佢地又係冇錢，所以先去打人，不過唯一唔同既人，佢地從來都冇認過自己係世界警察，民主解放英雄，最多，佢地都係自認做三合會成員，咁布殊成日認屎認屁，咪連我樓下班死飛仔都不如?

陽光小小姐

2006-12-27T00:21:00.000+08:00

早幾日去左睇《陽光小小姐》，都幾好睇架，可以舒緩壓力，笑足全場！評論就唔寫了，網上面有很多！不過有一樣野唔可以唔提，電影入面飾演大學教授 Frank 果個造形有 90% 似伊朗總統內賈德！真係好似的：

速記（一）

2006-12-20T13:34:00.000+08:00

睇《蜘蛛俠 3》的宣傳片時發覺，蜘蛛俠 3 所用的字體與 Sony Playstation 3 Logo 所用的一模一樣，真是太巧合了！

Playstation 3: http://asia.playstation.com/eng_hk/index.php?q=playstation_3/hardware
Spider man 3: http://www.apple.com/trailers/sony_pictures/spider-man_3/

天真的說謊者

2006-11-05T23:10:00.000+08:00

阿扁用一口純正的台語對住全球人民大喊：「我上任後自動將薪水減半，一年十三個月半，等於減少了五百五十萬元，六年來減少了三千三百萬元。如果要貪污，何必自動將薪水減半？」（起訴書中說他和妻子吳淑珍五年內貪污了一千四百八十萬）

這是我一生中聽過最強詞奪理的辯解，你肯減人工就等於你清廉? 阿叔，係人一睇都知你減人工係做俾人睇的，減黎博同情，Ｄ失去的錢咪當係買選票囉！減完人工就唔會貪污? 令我諗到：

張子強話：「我穿金帶銀，點會打劫金鋪喎！」
賴昌星話：「我住大屋買洋樓養唐狗，點會走私喎！」
陳日君話：「我信上帝既，說話點會唔中立喎！」
陳健康話：「我有老婆仔女，點會去包二奶喎！」
翁志文話：「我已經有七部相機九支鏡頭，點會仲買新相機喎！」

阿扁，你叫我點信你呀?

串人唔洗本

2006-10-31T13:05:00.000+08:00

張文光話羅太推行政策過急，那麼，民主派迫政府推行普選時，佢地有冇反心自問係唔係過急? 令政府、中央同大眾市民透不過氣來?呢Ｄ咪叫寬以律己，嚴以待人！

從最低工資到吸煙房（1）

2006-10-20T22:00:00.000+08:00

很失望，為什麼政黨如此的無能，市民年年給錢他們，他們這樣做戲，對得住良心嘛?或者他們已經沒有良心可言了，總之反政府就是英雄，鬧政府的就是正義。

最低工資理念是好，人人知道自己最少的薪金是多少，生活有個保障，但這個「完美」的理念，大前提是每人都肯定有一份工。不能夠保障人人有工做，憑什麼材料講最低工資?舉個簡單的例子，老闆有一萬蚊預算用來請人，原本請了三個，每個每月三千三，雖然是低、艱苦了一點，但總算養活了三個家庭。

如果設立最低工資呢?就當是五千元吧，天下沒有多少老闆會將自己的預算增加到 $15000 繼續僱用三個員工，他們會做的，就只是維持 $10000 預算不變，炒掉一個員工，叫另外兩個做多一點點就是了。

冇錯人工係加左，有兩家人的生活得到改善，受害的，只是失掉飯碗的那一家，沒有收入，兩餐不得溫飽，他當然可以去第二度搵工，但是法例一實施，到處也是這樣，因此而失掉飯碗的人數，真是多不勝數。

最低工資理念是好的，但一定要有其他周邊的配合，老闆的預算就是那麼多，所有員工只是在分餅，老闆並不會因為員工大食而整大個餅的，他只會請少幾個。香港真的需要的，並不是良政厲治，良政，只是該政策本身的理念的出發點是好，但並沒有其他人的配合也是徙然的。香港需要的，是強政厲治，要強，才使人服從，從而配合。

普通市民未必明白這一點，因為他們很多時候看到的，就只是「人工加了，那當然是好事」。但我相信政黨一定明白加人工反令飯碗不保的道理，他們是全心隱瞞市民，為的就是取悅市民，製造幫市民爭取更多錢的假象，爭取選票。

It's CHAOS!

鬧鬧鬧

2006-10-16T01:24:00.000+08:00

並唔係咩新聞，只係突然諗起，將一Ｄ雜亂既記憶寫出黎。

施政報告一出，各界齊罵！都預左的，政府做野幾時俾人讚過? 做得好Ｄ人覺得係應份，做錯少少野? 你去死吧！咁既環境下，最好就係乜都唔做，原地踏步，少做少錯，Ｏ政績、冇表現，等Ｄ市民連你叫乜名都講唔出，咁就鬧你唔到啦！

講返施政報告，罵都要罵得有道理嘛！鬧佢冇遠見，痴肺的，剩返幾個月任期，你想佢幾有遠見?唔通你仲要唐納德（Donald）起幾個月內起神醫港，車輪碼頭?！佢話起到你都唔敢信啦，真係拍電影搭佈景模型都未必夠時間，硬件唔得，軟件呢? 你想叫佢幾個月內改善空氣質素?種樹?幾個月，我驚連野草都未生到。

成日話政府唔派糖，又話政府孤寒。喂，政府既職責好似唔係奉旨派糖喎，久唔久派一兩粒俾你地，你地而家就咁得戚，真係野蠻！政府Ｄ錢唔係咁洗家嘛！咁鍾意政府派野，如果有個特首候選人政綱係上任的話將政府庫房Ｄ錢拎晒出黎，平均分俾每一個香港人，如果係有普選的話，唔知佢會唔會當選呢?

Newsweek (亞洲版)

2006-10-16T01:06:00.000+08:00

以前一直都覺得睇英文雜誌要睇 TIME 先似樣，覺得 TIME 係美國權威，後來發覺，自己的立場同 TIME 唔多一致，唔係唔鍾意佢，不過睇佢硬係覺得佢講既野唔合胃口，可能因為我唔係美國人關係吧！

不過偶然間俾我搵到一本美國的雜誌，報導手法同立場都好合我胃口，呢本就係"新聞週刊"(Newsweek)，佢起美國同埋中東關係入面，立場算係中立，唔會一味話美國幾神聖幾偉大幫其他中東國家「解放」，新聞週刊反而會探討點解中東唔肯接受美國式的民主，美國自己半身出乒係唔係已經有問題。

我另一個鍾意新聞週刊既原因，係佢地報導關於「環保」既新聞比較多同埋全面，呢Ｄ新聞百看不厭，因為我覺得，在不久將來，最熱門的話題、最賺錢的行業、最能夠回饋社會的，一定係環保。

國家地理雜誌

2006-10-13T01:25:00.000+08:00

月刊來的，不經不覺已經睇左四個多月，如果要我推薦五本我睇過最好睇既雜誌的話，呢本一定排首位！雖然是月刊，但係每期都唔算太厚，大約 150 頁吧。

國家地理雜誌強項係圖片，當然圖片背後的故事也十分精采。它說的地理，唔係以前讀書果Ｄ沉悶既理論，而係一Ｄ好貼身既事物，例如由一張張颶風過後既災難圖片講下災民既慘況、感受，再講下颶風點形成，颶風既種類，邊Ｄ地區最容易受威脅等，多角度一步步咁帶你認識晒成個關於風暴既知識，一Ｄ都唔沉悶。

又例如有一期講國家公園，大家唔好以為佢淨係會講美利堅合眾國入面果Ｄ，全世界最出名果Ｄ佢都有講，講下佢地既危機，講下點解Ｄ公園俾人破壞，又會介紹一班保護國家公園的義工，入面Ｄ相片，真係靚到叮一聲，你睇完都有一種唔想俾佢受破壞既感覺。

國家地理雜誌每一期除左有幾個重要既故事外，仲有好多有關地球最新既新聞，上至太空，下至海洋，甚至地幔既都有，所以千祈唔好以為「地理」淨係講下山、講下地、講下石咁簡單.

國家地理雜誌，係我誠意推薦俾各位想擴闊視野既朋友的一本良好讀物，睇完唔好當佢係普通雜誌咁丟棄，因為佢入面講既，唔止係普通雜誌的新聞同埋資訊，仲有好多可以跨越時間既知識。你儲起佢，第日睇返，就會發覺，你對地球的認識又加深了。

你會殺人嗎？

2006-10-02T01:14:00.000+08:00

如果世上有一個人，體內含有一種免疫能力，可以對抗世上很多的絕症，但一定要犧牲那人的性命，才可提鍊出疫苗，拯救數千萬的性命，你會怎麼決擇？犧牲一個人？還是犧牲拯救數千萬人的機會？

我認為，任何時候，也不可以用任何的原因和理由去結束一個人的性命，即使犧牲他可以救回千百萬的人命，原因係... 好眼訓，明天繼續！

一日一篇

2006-09-29T23:24:00.000+08:00

做人越黎越懶，睇返對上一次寫 Blog 以經係一個月前既事，好！下定決心一日出至少一篇！冇貨咪講吓今日做過D乜，一定有野寫。

話說前幾日公司所在大廈既管理處送左籃生果上黎賀中秋，細徙士既生果好快咁俾人搶晒，剩返個沙田柚冇人要，我見佢咁慘咪拎返去據為己有。今日得閒少少，終於開左佢黎食，食完仲將個殼還原返球形，再幫佢雕兩隻眼同埋個口（好似萬聖節南瓜咁），擺左起缸魚隔離（係，我養左缸魚的），如果下禮拜二個柚皮未俾呀嬸當垃圾丟了的話，就影返張相擺上黎俾大家睇睇（其實呢度可能得我一個人睇）。

你用過幾多隻 GSK 既產品?

2006-08-28T00:48:00.000+08:00

好快你就知！

可口可樂有幾多個品牌?

2006-08-28T00:47:00.000+08:00

30/8 話你知！

點解 KFC 冇可口可樂賣?

2006-08-28T00:45:00.000+08:00

29 / 8 講俾大家聽。

如何於7 天內令壹傳媒結業

2006-08-25T00:06:00.000+08:00

鍾欣桐起馬來西亞登台換衫時俾《壹本便利》既記者偷拍，仲大大隻字話佢「Bra 解」（唔知我係唔係諗多左，覺得佢想玩食字「巴解」巴勒斯坦解放組織），搞到好多香港人都好憤怒，又話壹傳媒賤格，又話佢冇良心，又話搞罷買等等。

藝人個個都齊聲譴責，又話香港社會唔可以容忍呢Ｄ敗類生存，如果呢Ｄ就係對壹傳媒作出既所以「回應行動」，咁聽完之後真係得啖笑。

真係咁想壹傳媒摺埋，做市民既就唔該唔好買佢Ｄ野，呢頭話佢賤格冇良心，果頭又拎住本《壹周刊》又講人地車震又彈人地假波，仲要一邊睇一邊鬧壹傳媒賤格，呢Ｄ說話完全係講俾人聽，並唔係出自真心的。

仲有Ｄ明星姐仔，成日鬧壹傳媒咸濕，專影佢地Ｄ露底走光相，又話以後都唔接受佢地訪問，講完唔夠兩日，咪又係三點式擺晒甫士影封面相，譴責?徙氣啦！

想壹傳媒摺埋用乜易，只要連續七日全部旗下刊物銷量都係「零」，Ｄ廣告商係醒目仔，一定會抽起全部廣告，咁佢就算唔係蝕入肉摺埋呀，都敗走台灣啦，駛乜又話遊行，又搞乜鬼聲討大會咁麻煩。不過，鬧壹傳媒果班人自問一句係唔係真係要佢摺埋先?你自己真係冇睇佢?睇完佢反感?覺得佢對你完全冇需要?人民力量唔需要有領導或者組織，發自內心既理念會幫你主導一切。

後加：陳日君先生講話佢信壹傳媒編輯自主，肥佬黎應該對呢旗下刊物既所作所為全不知情，如果陳生既理論係正確的話，咁肥佬黎應該係全香港唯一一個冇睇過壹傳媒旗下所有刊物既人（係連封面都唔會望、望左要洗腦果隻）。再諗深一層，如果呢Ｄ事係發生起《東周刊》身上，可能陳生已經日日鬧緊何柱國可恥，話佢落地獄喇。

癲狗咬人還痛 - 廢柴火燒不紅

2006-07-19T21:46:00.000+08:00

俾人話係癲狗，絕對唔係你想像中的負面，因為癲狗者，冇特定目標，o者係冇立場，邊個唔順眼就咬邊個，完全係估佢唔到。俾癲狗咬中既人，都有排煩，因為一旦俾癲狗咬，佢就會咬住你唔放，你點猙扎都冇用，你只可以任由佢咬，到佢咬到過足癮，就自然放口的。

俾人話係廢柴就慘好多，廢柴唔可以用黎生火，因為佢唔可以帶旺其他柴，廢柴只可以起人地燒到火紅紅時出黎企埋入去，製造Ｄ啪啪聲又或者煙霧咁，整Ｄ氣氛出黎，等人以為係佢帶旺個火。廢柴燒黎燒去都係得煙同埋啪啪聲，但佢地就以為呢Ｄ先係勁野，成日淨係識得整到社會烏煙瘴氣，冇日安寧。不過佢地都好可憐，因為如果佢地唔係咁整，根本冇人在意佢地既存在。

以前電台Ｄ時事評論節目主持係癲狗，而家果Ｄ，係正中廢柴。尤其係果Ｄ自稱不朋不黨既人，不文不類不三不四就有！

十萬個為甚麼（一）

2006-07-17T01:05:00.000+08:00

1. 為什麼太陽在東方升起?
因為東方報業集團於一九九九年三月十八日推出太陽報，既然太陽報是出自東方身上，那太陽在東方升起，也是正常不過之事了。注意的是這現象只會在香港出現，在外國，太陽可以化身成好多電腦（http://www.sun.com）存活在辦公室室之中。

2. 為什麼食物擺耐了會變壞?
因為食物製做商做了手腳，他們為了盈利，防止顧客於低價時買進大批食物食過世，所以在食物中加入霉菌的苞子，就好似雞蛋孵化少雞一樣，過了一段短時間，苞子就會孵化出霉菌，令食品發霉變壞。唯一的解決辦法，就是到食物製做工場示威了。

3. 為什麼傷風會打噴嚏?
傷風的時候，周身唔自在，好想休息下。如果傷風只是自己唔舒服的話，公司一定唔俾你請假，所以造物主好聰明地令人類傷風時可以順便騷擾埋其他人，打噴嚏不但可以製做噪音，更加能夠影響附近同事的心情，所以如果你傷風打噴嚏時唔大大聲，冇口水噴出的話，就係有違造物主原意，對造物主不敬！

新石頭記

2006-07-04T02:24:00.000+08:00

在一個落後的城市裏有一個簡單的市集，市集被一條長長的泥路分為兩邊，靠近民房的一邊，多是賣些從附近農村收割回來的農作物，又或是自己養的家禽牲畜。他們全部都是家庭式作業，每一檔所賣的數量也不多，但勝在款式齊全和新鮮。

由於剛收割下來的蔬菜便送到了市集，菜頭的切口還是濕濕的；用藤籮盛著的馬鈴薯還散發出一陣陣清幽的泥土氣味。活生生的雞在竹製圍欄內通處跑，有時又展開翅膀，一副得知自己大難臨頭，想逃走的樣子；預先切成一磚磚四方型的牛肉和豬肉整整齊齊的排列在木製大檯上，帶著白色圍裙的檔主正用麻布和竹製成的拍子驅趕對鮮肉虎視耽耽的蒼蠅。

泥路另一邊的檔，賣的多是帶商業味的消費品。一檔賣糖果的，擺於菜檔的對面，雖然是落後地方，但賣的糖果全部用天然成分製做，那種純厚的清甜，是任何名牌子的糖也不能比美的。除了糖果檔，還有賣衫的、賣柴的、賣燒魚燒肉等檔口。

城市雖然落後，但民風純樸，整個市集內的檔主與顧客也有說有笑，問問最近的生意情況，寒喧一下家裏的近況，有時需要去小解，隔離的檔主也會很樂意幫忙睇檔。整個市集由朝到晚也是熱熱鬧鬧，沒東西買的也會到市集去聯誼一番。

故事是這樣發生的，一天的早上，太陽也未在地平線上升起來，只見天邊開始被染成魚肚般的紅色，突然有一巨大殞石從外太空以高速撞向地球，將整個城市也毀滅了。（完）

樵夫與斧頭（最終回）

2006-07-02T02:52:00.000+08:00

從前有位樵夫在森林裏斬樹，一不小心，將個斧頭掉了落湖，樵夫很傷心，因為這個斧頭是他唯一的生財工具，樵夫站在湖邊痛哭，一位神仙突然從湖中上了來，拿著兩把斧頭，一把是樵夫原本鐵做的，另一把則是用純金製造的，樵夫想也不想，就指著鐵的對神仙說：「這不是我的斧頭。」再指著金造的那一把，向神仙說：「這把也不是」，樵夫繼續說：「我的斧頭是用鑽石琢磨而成的，長廿四吋，寬十吋，厚一點五吋，淨重二千卡，十年前在蘇富比的拍賣中用暗標形式以三十億元投得。」

神仙聽後，就對樵夫說：「先生，很對不起，我沒有拾到你的斧頭，你方便的話，留個電話號碼，我一拾到就通知你，再用聯邦快遞送到你府上。」樵夫聽後一頭暮水，正想問神仙什麼是「電話號碼」的時候，神仙已經消失於湖中。

樵夫沒有了斧頭，也就沒有收入，不久也進了城當乞丐。

樵夫與斧頭（二）

2006-07-02T02:33:00.000+08:00

從前有位樵夫在森林裏斬樹，一不小心，將個斧頭掉了落湖，樵夫很傷心，因為這個斧頭是他唯一的生財工具，樵夫站在湖邊痛哭，一位神仙突然從湖中上了來，拿著兩把斧頭，一把是樵夫原本鐵做的，另一把則是用純金製造的，樵夫想也不想，就指著鐵的對神仙說：「這是我的斧頭」，再指著金造的那一把，繼續向神仙說：「但我的斧頭已經又霉又爛，唔用得幾耐喇，草民家中上有高堂，下有妻兒，唔知神仙可唔可以大法慈悲，賜我一把金斧頭，等草民可以改善生活，他朝草民必定報答神仙的大恩！」

神仙聽後覺得留把金斧頭也無什麼作為，倒不如幫幫這位老伯，所以就賜他金斧頭。老伯得到金斧頭後，將之賣掉，再用得來的銀兩開了一間林木公司，管理該森林。森林內種滿了快速生長的林木，公司就負責賣木材和做一些林木保育的工作。十年後，老伯仙遊了！他的後代繼續打理這家族生意，那時他們企業的已經是領先國際，是行內的表表者。他們的成功，是因為把老伯的格言銘記在心 - 「不好好把握機會的人，只會原地踏步」。

後人為了紀念老伯的果斷和神仙的慈悲，就在那個湖的舊址建了一間寺廟，讓該事跡流傳萬世。

樵夫與斧頭（一）

2006-07-02T02:16:00.000+08:00

從前有位樵夫在森林裏斬樹，一不小心，將斧頭掉落湖中，樵夫很傷心，因為這個斧頭是他唯一的生財工具，樵夫站在湖邊痛哭，一位神仙突然從湖中上了來，拿著兩把斧頭，一把是樵夫原本鐵做的，另一把則是用純金製造的，樵夫想也不想，就指著鐵的對神仙說：「這是我的斧頭。」神仙見樵夫那麼誠實，就把那鐵的斧頭還給他，之後就消失於湖中。樵夫也就繼續過著他艱苦的伐木生活。

食環處人員不是超人

2006-06-27T12:43:00.000+08:00

當各大報紙都話食環處又搞出人命，追捕阿伯迫佢跳渠自殺，仲要見死不救時，我除左替死者感到難過，都替食環處感到難過。

阿伯跳渠，係佢覺得自己識游水，可以逃避食環署人員的追捕，佢係離對岸不遠時先突然叫救命遇溺，之前都仲游得好地地，試問點樣報警? 況且一遇溺既時候，食環處人員已經第一時間報警，Ｄ路人甲又埋怨佢地唔跳落去救人，大佬呀，食環署人員唔係救生員，唔係個個都知點樣起水入面撈返個人上岸的，淨係識得話食環署人員唔報警，咁點解Ｄ路人甲又唔報，話食環署人員唔去救人，點解你唔去救? 食環署人員追捕緊小販時，你Ｄ路人甲就企起度食住花生等睇戲，如果話食環署人員冇人性，呢班事後咁「見義勇為」向傳媒講述事發經過既「良好市民」，就真係連禽獸都不如。

記得早前食環處人員追捕小販時小販意外被車撞到，當事的圍觀市民都指責食環處罔顧人命，非要迫死人不可。被撞的小販的確是無辜，因為無牌擺檔罪不至重傷入院，但香港係一個法治社會，全部野都講法律，你無牌擺檔就係犯法，你起禁止擺賣既地方擺檔就係犯法，執法人員都係奉命行事，依法拉人，正所謂「做過就要認，打就要企定」，你逃避法律責任選擇逃走，食環處人員梗係追啦！有邊個會知道無端端有車出黎撞親果個人先得架? 撞到之後食環處人員已經即刻報警，Ｄ人又怪佢唔幫傷者急救，大佬呀，你有冇知識架，冇正式學過急救既人亂咁幫人急救，好多時候只會令傷者情況更糟糕。

乜都淨係識鬧人、永遠將責任推被其他人既路人甲乙丙，通常事發時都只會食住花生等睇戲，撐大喉嚨叫囂，咁叻，又唔見你跳落水陪阿伯一齊游過去，衝出黎幫傷者急救? 食環處人員唔係超人，佢地入面唔會個個識陸上同埋水上急救，如果佢地真係識，神早走去做救生員等既其他工啦，搵鬼做呢Ｄ唔拉又俾報紙話蛇王，拉唔到又話無能，拉到又俾人話冇人性既工?

邊個咁得閒標籤你?

2006-05-17T01:16:00.000+08:00

睇報紙，寫道「房屋委員會早前推出的公屋租金政策建議，提出在不同座向、景觀及樓層的新落成公屋，引入不劃一租金，並諮詢公眾，現時卻很可能胎死腹中。不少居民擔心不劃一租金會造成標籤效應。。。。。。」

所以我幾時都覺得「香港人」係一個好神奇的民族！起出面租樓，你幾時見個地產鋪同你講全港租盤劃一租金呀！你用六千蚊租個唐樓，唔通又可以用同樣價錢租返個一樣大細的畢架山一號? 根本冇可能！租金因應地區、新舊、環境等上上落落根本就係好正常，我租平屋唔代表Ｄ乜，唔俾我起附近工作、少返屋企、淨係想有瓦遮頭呀? 如果有人可以租得平，住得開心，慳到錢，我都唔知幾欣賞佢，讚佢叻仔都黎唔切啦！歧視?！冇可能！

捍衛基層住屋權益聯盟話不劃一租金會造成分化，分邊個? 化Ｄ乜? 你見到畢架山一號Ｄ人歧視窩打老道八號嘛? 唔通皇府山入面向北同向南兩個單位的人水火不融? 混帳！區區幾百蚊租金分別就話公屋居民會搞分化? 你真係當我地有病咩！

如果真係有貴價公屋的住戶歧視平少少租金果Ｄ，咁佢既人格真係好有問題，大佬，你有錢都唔駛住公屋啦，俾你住貴幾百蚊又有幾威? 又唔見你歧視下租山頂住果Ｄ人? 而家慳得就慳，住平少少食好Ｄ，計落仲有著數！

住得平少少就話驚分化，驚俾人標籤，唯一可以解析既原因，正是因為佢地就係果Ｄ會搞分化、標籤其他人的無聊人，捍衛基層住屋權益聯盟，請不要扮到好似代表我地全部公屋住戶咁，我從來都冇選過你出黎，或者授權俾你代表我，成日起度發窮惡，你咁搞，人地真係以為我地住公屋既個個都係咁就唔好啦！

自己企出黎就話可以代表全部基層市民，咁我聽日又成立一個「捍衛富豪泡妞權益聯盟」，話自己代表緊全港富豪都得啦！

菲林已死?

2006-04-11T23:49:00.000+08:00

呢幾年數碼相機普及之快，真係令各大菲林製造商大吃一驚，執既執，轉型既轉型，就算係柯達同埋富士都縮水左唔少，好多人覺得菲林時代已經終結，好快菲林就會絕種，但係我又唔係咁睇，因為菲林始終都有佢無可替代既地方，最重要既係，佢究竟搵唔搵到自己既定位。

好多年前，蘋果電腦俾廉價ＰＣ打得落花流水，好多分析員都話佢遲早摺埋，因為果陣時蘋果既定位係普羅大眾，同ＰＣ的市場一樣，起度搶緊同一班人，咁蘋果價錢高，當然冇人會買，好彩蘋果電腦最後幫自己搵到新既定位：專業繪圖、出版、印刷、影音製作等多媒體市場，的確很成功，因為該市場以ＰＣ當時的性能是無法應付的。而家電腦市場開始慢慢容合了多媒體，開始變身成家電的一分子，這正正是蘋果發圍的大好機會，大家看著蘋果如何以少量的精英人才，打敗ＰＣ中的冗腫巨人吧！

講返菲林，只要佢地都搵到自己既方向，搵到一Ｄ數碼相機替代唔到既特徵，再將之強化，有朝一日，當潮流趨勢再次轉型的時候，一定可以再次發圍。

將 idea 記低

2006-04-08T00:29:00.000+08:00

成日行行下街或者做緊其他野既時候，都會有Ｄ同進行緊既事冇關既 idea 浮現出黎，好多時候諗住：「丫，呢個 idea 幾好喎，等陣得閒時 mark 低佢先。」呢Ｄ情況，往往到最後都會冇左件事，唔係因為我冇得閒既時候，而係到我得閒時，已經唔記得左頭先諗到Ｄ乜野 idea。睇返歷史，成功既 idea 多數都唔係一步步咁諗出黎，而係沖緊涼、跑緊步、食緊野、或者係玩緊手指既時候無端端起腦海入面「Boom」一聲咁爆出黎。究竟佢地係用咩方法記低呢Ｄ突然爆出黎既 idea 呢?

我畢業想做乜

2006-04-05T02:12:00.000+08:00

仲有幾個月就畢業，其他同學都努力搵工，我就仲諗緊：做乜好！雖然我係讀電腦，但係一份百分百既電腦工作對我黎講絕對唔係首選，最想做 D 係賣橋既工，例如廣告果 D ，真係唔想局限左自己起電腦呢一行。但係，我又冇讀過相關既科，人地會 Show 我嘛?

真心造假新聞

2006-03-21T16:16:00.000+08:00

當你日日睇雜誌報紙電視報導新聞時，你有冇感覺到唔知邊Ｄ先係真、邊Ｄ係落左味精、邊Ｄ係假大空? 造假東西最無恥的，就係將真的和假的混在一齊，讓你分不開那些是真，那些是假！這樣閃縮的造假，太縮頭縮尾了吧！

不如乾脆來個由頭假到落尾的新聞，睇的看了，明白了，處之一笑。正所謂真亦假時假亦真，與其採訪完後還要在編輯房間內開會加鹽加醋，倒不如一開始就坐在電腦面前以意創造來得實際！Hamga (spelling corrected by simon)內的新聞，比一些坊間暢銷報紙內報導的還要來得真！至少，他們是真心造假新聞。

影畢業相的日子(2)

2006-03-19T23:02:00.000+08:00

中大崇基影相日最大收獲：意外見到 Cliff! 真係好耐冇見過佢喇！雖然係傾左短短幾句，但係都好開心！原來佢繼續設計，話唔定不久將來會見到 Cliff 既展覽。盼望、期待~！

影畢業相的日子

2006-03-19T22:26:00.000+08:00

呢排係中大影畢業相的日子，我又充當朋友西門兄、同學丹尼斯同埋拔同學的相機佬，始終都係鍾意幫人影相多個自己影，眼見佢地背光，企得唔好，有遮掩等就會好緊張，因為影出黎後尾先知影得唔好既話就冇得補救，所以寧願影既時候叫佢地左Ｄ左Ｄ、右Ｄ右Ｄ、高Ｄ高Ｄ、低Ｄ低Ｄ！雖然影一張相係耐左好多，不過我覺得係值得的。

起菲林既年代，或者可能係因為菲林、沖、晒都係成本，所以Ｄ人起影一張相之前都會構好晒圖、度好晒位先影一張相，比較起而家既「數碼，衰左咪影多張」既心態真係好唔同。心態唔同左，影出黎既產品都有所分別，睇返以前大師級既作品，真係睇到相背後既「心」。

再一次轉型

2006-03-19T22:21:00.000+08:00

好耐之前講過話要將 blogger 轉型，希望寫Ｄ更加隨筆既野，以增加我寫日誌既頻率。點知講完之後都係冇左件事，終於宣佈：轉型失敗！

而家再一次轉型，希望寫Ｄ更加無聊、更加隨筆既野（例如話今朝食左碗火腿通之類），希望可以日日有話題，日日有得寫！

這叫支持南韓示威者嗎？

2006-01-11T13:54:00.000+08:00

今朝睇新聞，見到又一批香港人「聲援」南韓示威者，陪佢地一齊絕食抗議，要求政府立即釋放佢地，這些「同情」的行為，本人實在看不過眼，那些行為不單侮辱香港人，也在侮辱南韓人。

香港是個法治社會，一切也有法可依，正所謂錯就要認，打就企定。好彩現今資訊發達，讓我地可以起電視睇到現場直播，睇到當時的一切。絕大部分的韓農也是和平示威，但某些不安分的拎起記者梯掟向警察，又用繩索勒警察，這是過了火位，即使有千萬個聽者心酸、聞者流淚的理由，也改變不了者事實。

多麼希望韓農是勇於承認自己的過錯，勇敢面對責罰，接受法律的制裁。至少這樣做我仍會覺得他們是負責任的一群，是值得尊敬、值得同情的一群，如果當初他們的代表企出來說：「請你們盡快告知我們的刑罰，好等我能告知家中妻兒能否回家過年。」這樣才是對自我尊嚴的體現、對自己民族的尊重、對香港法治精神的尊重。

現今所要求的，竟是無罪釋放，有罪無罪，大家心知，即使最後贏了官司，也輸了人格。也許離鄉別井，思鄉情重，所以他們才有這樣非君子的舉動。陪同他們一起絕食的香港人，我知你們是出於同情心，但也不要用錯方向，現在好應該告訴韓農香港的司法是如何的公平，不用擔心。真不希望該批韓農英雄的來，狗雄般去。

還有陳主教，真係覺得他罵警方高層為「香港之恥」罵得好、罵得妙！因為唯有真正身為「香港之恥」的人，才有資格罵人為「香港之恥」，因為只有他才知道成功登上這寶座的必要條件。不過對於他的提攜，警方高層還是婉拒了。這個寶座，暫時還時由陳主教一人獨領風騷吧！

終於無線了

2006-01-07T00:16:00.000+08:00

早年（都有三幾年）ＭＫ象徵式賣給我的路由器最近壞掉了，ＭＫ用左幾年二手賣俾我，我就用多佢三年，都算對得製造商住喇！壞左之後好唔方便，只可以一部電腦上網（一係大機，一係 iBook），諗返都對唔住 iBook，為左打 GTA2，竟然將佢熄左，對上一次熄佢已經係一年前既事，今次竟然係因為一隻電腦遊戲，為左要同人打機而將上網既權利俾左大機！熄佢果一下，真係好似親手殺死自己個仔一樣！

不過唔緊要，我今日已經起電腦節用平架（$31x）買左個無線路由器俾佢地兩兄弟，而家佢地唔駛爭上網，可以一齊上，iBook 終於進入無線年代（雖然三年前買佢果陣佢已經有呢個功能）！仲有仲有，我仲起電腦節買埋無線鍵盤加滑鼠，成套都係$ 16x，羅技喎！勁野來的，真係好平，雖然佢地冇特別功能，但係我覺得冇仲好，反正果Ｄ特別功能對我呢Ｄ正常用家係冇用的。

冬天起床上面一邊起網一邊用 iBook 機底暖腳，感覺一流！

渴望名單

2005-12-21T23:18:00.000+08:00

好多人都鍾意整張 Wish List，過時過節拎黎騷俾人睇睇，等Ｄ人識做地買你名單上面頭幾位既野，又或者係自己買黎獎勵下自己咁。臨近聖誕節，等我又整張「渴望名單」先：
1. Tivoli Audio Model One 柔和的聲音令人放鬆、放鬆再放鬆
2. Zeiss Ikon 連動測距相機
3. PowerBook 世界上最華麗的筆記簿電腦
4. Hasselblad CFi 150mm 相機鏡頭，冇人會嫌多的
5. Digisix meter 測光錶，俾我新相機用的

新的舊相機

2005-12-21T23:00:00.000+08:00

起網上面 bid 左一部 1976 年出的「哈蘇」500C/M 相機，今日終於維修完畢，重出江湖（因早前自己錯誤操作，令佢入廠）。鍾意佢全手動操控，乜都要自己較，唔駛入電，拎上手好硬淨同埋......好重！

佢既鏡頭係由世界頂尖既光學公司「蔡司」製造，品質有保證！準備遲多幾日櫬得閒Ｄ，出去買菲林黎試試佢。今個聖誕節，因為買左佢，令我銀行戶口由五位數暴跌至五百蚊都冇，唔影返多Ｄ靚相，邊對得住自己！

終於放假

2005-12-17T02:03:00.000+08:00

真係好，終於完成左漫長的考試（由頭到尾歷時 2 小時），可以舒舒服服咁放假（16, 18, 20, 23, 28 號都有 project deadline，距離完成仲有一大段距離），以前一考完試就好開心，係咁玩係咁玩，而家一考完試，一Ｄ開心感覺都冇，淨係覺得考完試，姐係代表Ｄ報告限期就近左一日，咁搞法，呢個聖誕節都唔駛去玩。

轉型

2005-12-15T00:43:00.000+08:00

發覺次次寫野都要諗標題，諗下內容，又要組織，考慮完都已經唔想寫，所以都係試下轉型，隨手寫下今日做左Ｄ乜，寫下忽然諗到既野，試下咁做會唔會提高我寫 blogger 既意欲。

如果咁都唔得既話，我都只可以話我唔係寫野既材料。但係咁冇組織寫野，又好似有違我原本申請 Blogger 既意願......

時間表

2005-12-06T00:33:00.000+08:00

（二）
兒子：「媽媽，我同果個女仔拍拖都有一段長時間，發展得幾穩定，我地想結婚喇。」
媽媽：「都好呀，大個仔遲早都要結婚，不過我想要抱孫時間表。」
兒子：「都未結婚，邊有咁快諗抱孫時間表。」
媽媽：「咁你最後係唔係會生仔丫？」
兒子：「係既......」
媽媽：「沒有路線圖，沒有時間表，沒有達致抱孫方向的婚姻是可以接受的嗎？」
媽媽：「爭取抱孫時間表。」
姨媽：「爭取抱孫時間表。」
姑姐：「爭取抱孫時間表。」
叔伯：「爭取抱孫時間表。」
遠房：「爭取抱孫時間表。」
媽媽：「拿，我地唔係迫你，係幫你儲籌碼咋，等你可以用呢Ｄ籌碼黎向個女朋友反映我地對抱孫既訴求。」
兒子：「咁快同女朋友講抱孫，我驚嚇親佢，令佢反感喎。」
媽媽：「你呢個衰仔，冇膽又怕事，竟然幫女朋友講野，簡直出賣自己人！」
姑姐：「都叫你生舊叉燒好過生佢啦。」
姨媽：「唔緊要，等我去美國冒險樂園度同Ｄ街坊反映下，等佢地周圍唱，到時果個女仔一樣會聽到。」
兒子：「大佬，想抱孫都唔駛搵我條命黎玩嘛！」

時間表

2005-12-05T01:43:00.000+08:00

（一）
兒子：「媽，我喜歡了一個女仔，想同佢發展。」
媽媽：「好，但我要一個結婚的時間表。」
兒子：「未諗喎，要發展落去睇下點先知嘛，邊會咁早諗定呀？」
媽媽：「唔得，我要一個結婚的時間表。」
爸爸：「爭取結婚時間表。」
哥哥：「爭取結婚時間表。」
姐姐：「爭取結婚時間表。」
妹妹：「爭取結婚時間表。」
媽媽：「拿，我地唔係迫你，係幫你儲籌碼咋，等你可以用呢 D 籌碼黎向個女仔反映你對結婚既訴求。」
兒子：「我連係咪同佢結婚都未諗定，邊會諗結婚的時間表。」
媽媽：「冇時間表，就係原地踏步，就係大倒退，好，咁你連拖都唔好拍喇，維持返現狀啦。」

網頁特色？！

2005-10-13T02:50:00.000+08:00

幫學校整網頁既時間越長，越係覺得自己整網頁既一套原則同上頭既期望有好大出入。就以今次為例，整完俾佢地過目之後既評語就係：「呢個網頁唔似平時見開果D，唔似一個網頁，似出版物多 D，你應該加 D 網頁特色落去。」

俾佢咁一講，我就真係糊塗喇！乜野係網頁特色？就好似佢咁講，「似出版物」，呢個唔係特色嘛？係幾時開始，網頁俾人定左形，一定要附合某些「條件」，整出黎既先「似一個網頁」？乜網頁，都有分似同唔似嘛？

我整網頁原則好簡單，就係：
1. 資料要易搵
2. 簡單唔花巧
3. 配合主題製做一個 icon

甚麼標題捆邊，又陰影又爆光，標題文字又揀埋晒特別字體再扭黎扭去，再加個無敵花花碌碌既牆紙，對不起，雖然我懂得怎樣做，但我的作品中，一定唔俾有呢 D 野出現，做出黎，真係整臭我個名！

話雖如此，雖然我已經好努力咁捍衛我既作品，但係上頭要求（正確黎講應該係強迫）要將我原本既作品加插以上提到既「網頁特色」，我又可以唱反調嘛？

那些人，對任何時物腦海中已經幫佢定晒形，將自己困起個框框入面，咁都叫 Design？真可笑！

繁體字的可貴

2005-09-05T01:04:00.000+08:00

漢字有超過四千年的歷史，是人類文明的重要遺產。四千多年來，漢字也沒有出現大變化，基於呢個原因，現代人要參考千多年前的古籍也沒有大問題。當然，我所說的，只限繁體字。

五十年代東方掀起了一片西化風氣，繁體字被幾個國家人離棄了，就如中國，她創造了簡體字，簡體字主要是：

1. 筆劃簡化
2. 用別字代替
3. 用古字代替

原因當然是俾西方蝦到出面，諗無可諗就賴自己Ｄ文字繁複，寫得耐，所以唔夠人發展得快，國家唔夠人先進。大佬呀，文字係一個民族既遺產黎架，話改就改，你估而家改遺囑咩！

就係咁樣，珍貴既繁體字就俾某Ｄ政權改到不堪入目、七零八落。首當其衝就梗係果Ｄ國家既下一代啦（同埋下幾代都係），睇返Ｄ古文，全部都係繁體字，完全係感通唔到，好地地一個國家，就咁幫自己既下一代製做文化壕溝，你都咪話唔慘！

最慘就係，佢地改左唔用繁體字之後，對國家發展又唔係有大幫助喎！計我話，睇你個國家掂唔掂，都係要靠個好既政權、好既領導、好既班子。繁體字用左幾千年都好地地，中國幾千年黎都咁強大，唔會無端端扯唔起呀嘛?

所以襯而家為時未晚，果Ｄ國家應該重新尊重繁體字，推行「正字運動」，俾Ｄ國民認識返真正自己民族幾千年來辛辛苦苦留下來的精髓。繁體字，應該是受到全世界人類尊重的人類文化遺產。

（基於與內地有更緊密的溝通，學簡體字我是不反對的，但如王維基先生那樣建議完全取代繁體字，我便不敢苟同了。）

王維基先生於 2005/8/24 東周刊專欄的一部分

魚目混珠

2005-08-15T09:19:00.000+08:00

灣仔地鐵站通往入境大樓既天橋，一向都係免費報紙兵家必爭之路，呢幾日朝早行經既時侯，發覺左一樣好奇怪既事情，就係「頭條日報」同「AM730」陣營前面，都企左個衣著同佢地好似，連顏色都差唔加既人，企起度派「大紀元時報」，或者果Ｄ人真係咁巧合著左人地套制服都唔定，但係俾我既感覺係：佢地有心魚目混珠！

明人不做暗事，市民拎唔拎係佢地既自由，唔駛欺騙市民拎你份報紙（至少對我黎講覺得係）呀嘛? 如果我係唔想睇既，唔小心拎左都只會擺佢落廢紙回收箱啦，你估我地真係乜野拎左都會睇咩！

香港沒有言論自由？

2005-07-24T02:13:00.000+08:00

常聽人說香港沒有言論自由，甚麼一言堂等。有時真的不明白，為甚麼香港人那麼喜歡捆綁他人以令自己自由。電台也有自由去決定自己的節目路向吧？為可電台刪減了一個右派的節目，就被罵個狗血淋頭？我敢肯定，假如亞視停播「你有理講」，那班民主鬥士一定不會示威，說亞視「自我審查」。

香港人，已覺得民主派是「忠角」，親政府的是「奸角」。但有很多所謂「民主派」人士，也只是嚴以待人、寬以律己，對敵對派系，就一味叫下台，自己嗎？道個歉已公德無量了。

我在想，大家也只是各侍其主吧，用不著下下也把人趕盡殺絕，贏得市民的喝采，輸掉香港的前途，值得嘛？很多時侯，普羅大眾所想的，並不一定正確，市民各人也是為自己利益著眼，整體嗎？管他吧！

想體驗言論自由嗎？「大紀元時報」就是一個好例子：法輪功、反共、退黨等應有盡有，你試試把它帶到羅湖過關吧，你一定深深感受到香港還有言論自由，但願你還順利返回來好好的享受這自由。

Thinking in the rain

2005-06-25T02:09:00.000+08:00

連續落左幾十日雨，空氣好到不得了，吹來的風都是清涼的。我喜歡下雨天，看著雨點敲打著玻璃窗，街外的景物頓時變得矇矇矓矓，雨點滑下時，光線給折射並不斷轉變，漂亮極了！閉上眼睛，聽著雨點敲打玻璃窗時發出的聲音，時大時細，高低有序，就如一首永遠不會重複的音樂，聽著聽著，心中泛起了好多下雨的回憶，雖然當中有苦的，但沒有苦味，甜也來得沒有意義了。

再沒有愛克發菲林

2005-06-08T02:06:00.000+08:00

上禮拜聽聞愛克發膠片公司（愛克發屬下生產菲林的公司）已經在德國申請破產保護，愛克發是第一間量產彩色菲林的企業，落得如此下場也只能怪他未能及時轉型至數碼業務。有人說菲林已經走到窮途末路了，很快就會俾數碼相機代替。但這樣說未免有點以偏概全。

充其量，我只敢苟同富裕地區內，數碼相機真的取代了傳統相機與菲林的「普通用家」市場為什麼這麼說呢 ? 先講數碼相機的價錢，品質能沖晒標準大少相片最平的，也要上千元，還未計其高用電量。菲林相機，用百多元的價錢，已經能夠買到一部傻瓜相機，影普通的家庭相，足夠有餘！經濟能力稍遜的，也怕未能負擔得起。

雖然傳統相機要買菲林，但如果用家一個月先係影兩三筒（甚至更少）的話，菲林成本還要比數碼相機一個月內的跌價來得少。城市人不用菲林相機，或多或少也和朋輩影響有關，眼見朋友也是用數碼相機，無端端拎個菲林相機出黎影，影完仲冇得即刻睇，真係幾冇癮！

但如果你係少影相既人，真係無謂投資落去數碼相機度，免得你未影夠一百張，你部相機已經過時。

（下回繼續）

成功的感覺來了

2005-06-07T01:52:00.000+08:00

發覺我暑假和平常返學日子都係如此的清閒，有正經野唔去做，走去做一Ｄ自己一直想做既野。無他，那些正經事情我真係沒有太多興趣。

幫學校手整網頁，原本諗住係入去學下野，不過三個多月來，裡面的運作模式，和我以前的也差不多，新技能，應該都係學唔成家喇！畢竟，到現時為止，都是將一些我老早已經懂得的技能應用出來。

或許，人家給錢你，就是想你為他服務，那來閒情逸緻教你深奧的技巧，想教，也沒有時間吧！還是繼續造我一直想實現的夢：做一個小巧的程式，人人會用，個個適合，一用上癮！現階段看來，這夢想快要變成事實喇。

香港沒有收費中文小報

2005-05-30T22:25:00.000+08:00

英國有《太陽報》，美國有《美國今日報》，還有好多好多的城市，都有以「小報」型式經營的暢銷報紙，他們走的是娛樂化、雜誌化、通俗化的風格，新聞貴多不貴精。圖片做主打，標題大大隻，完全係為方便閱讀為準。

普通上班族，閱讀小報的比大報為多，原因都係佢地多數都會起早餐或者午飯時間匆匆的閱讀，那有時間來與紐約時報一塊兒深入探討問題，一同分析社會形勢。香港市民生活節奏急速，無暇閱讀詳盡的新聞報導，一份有料的小報在香港實是有好大市場。

都市日報不算數，因為它只能夠成為一份「輕盈版」的小報，內容不多，也不全面。派發的地點也是局部性，未能真正成為一份香港的報紙。真的想有一份報紙，能夠讓我在巴士與地鐵內不需要怕妨礙別人盡情的揭頁，翻弄。

好工具（二）

2005-05-30T01:54:00.000+08:00

學了幾年電腦，也開始有些相同的領會，某些人常常標榜自己用的軟件幾犀利幾犀利，功能有幾咁強橫，所以佢地做出黎既野係幾咁專業。但係一睇他們的製成品，真係唯有報以一笑：笑他們的無知（專業軟件整出黎既就係專業作品）、笑他們的無能（濫用軟件的強大功能，做出一個《四不像》）。

就連一個普通的家庭主婦也知道的道理，將一大堆上好的材料與調味料撈埋一齊炒，大家味道相撞，性質相沖，最後上碟的只會是一碟品味怪異沒有主題的豬餿！真正的高手，用水煮豆腐，也能令食客食得齒頰留香，回味無窮。

講得白Ｄ，就係話有Ｄ人設計網頁，係咁用Ｄ所以高科技既特效，Ｄ圖片有咁花巧得咁花巧，又加陰影，又加白邊，再加漸變同埋雪花，最後黎多個無敵傷眼霓虹效果，Ｄ圖片花到真係見者留淚，Ｄ人一眼望埋去，連Ｄ字寫乜都睇唔到，莫講話靚定係唔靚，連最基本既內容表達都做唔到，真係垃圾過垃圾！

好工具（一）

2005-05-30T01:52:00.000+08:00

從前就是這樣的無知，看見某大攝影師用某名牌子相機拍到一張好照片時，就會覺得如果我買了一部這樣的相機，我也可以拍到好照片，經常的發夢，想著自己拍得如何如何好的照片，想著自己的照片有多麼多麼的賣錢，然後我就可以發達，搬大屋，歎世界，寓工作於娛樂！

現在想起也覺好笑，相機就是攝影師最犀利的武器，光靠武器性能如何如何好，但如果你根本不懂得開槍，最後結果就是亂掃亂射，到頭來一點成績也沒有，一件上好的利器就這樣糟塌了，嗚呼哀哉！

攝影講求感通，能將心中想表達的「一點東西」化做相片表達出來，就是好相片。不過，我還是希望有一部能夠得心應手的利器，這就是 Zeiss Ikon!

法郎。法郎

2005-05-23T01:09:00.000+08:00

二零零三年五月， Franc Franc 進駐了香港，有好多人而家還不知（至少我係其中一個）為這間擺滿了法國設計師傑作的店舖，是一間不折不扣的日本店。

Franc Franc 賣的東西好似 G.O.D. 賣的，路線也一樣，他們都是走中高檔的。一件日本城賣十蚊的除臭碳， Franc Franc 賣數十元。宜家家俬賣數十的的相架， Franc Franc 賣二百多元。雖然款式有九成相似，不過氣質唔同就係唔同，就算表面睇唔出有乜唔同，一睇件野底部既條碼：喔！真係有唔同！至少對自己可以這樣說。

Franc Franc 教曉香港人甚麼才是「能登大雅之堂」的東西，甚麼才是氣質，甚麼才叫有品味，這些難得的體驗，並不是在日本城或吉之島十蚊店逛一天便能夠領略到的。Franc Fran 產品雖貴，但它帶給顧客的體驗，更加寶貴。

一九八四

2005-05-21T17:46:00.000+08:00

不是想寫書評，只不過是最近行開中華書局無意中發現了這本從來只聽過書名的書。第一次聽到《1984》這本書是在蘋果電腦的廣告內，宣傳蘋果麥金塔的出現，令一九八四年不次小說《1984》中描述的那樣。這個廣告雖然是一九八四年拍的，不過而家睇都仍然充滿時代感：蘋果麥金塔廣告

雖然蘋果犀利，有咁好既廣告，不過《1984》作者仲犀利，因為呢本書係佢五十年代既作品，直到而家都仍然被世人所傳誦！

《1984》 online version

化敵為己

2005-04-19T01:27:00.000+08:00

正所謂沒有永遠的朋友，也沒有永遠的敵人，起商業社會入面都唔知邊個係你朋友，邊個係你敵人。與其係咁，不如將敵人買起（唔係買起佢絛命，造低佢！而係買起佢成間公司。）這下可好了，化敵為己，咁就唔會再有人同你今日傾咩野合作，聽日又鬥餐死！

泥磚（Adobe）同埋巨媒（Macromedia）就係一個好好既例子。又一開始兩間唔同市場既公司，做做下巨媒開始有Ｄ產品同泥磚相似，再做做下巨媒有Ｄ產品發展空間仲大個泥磚。泥磚諗：「掂！你做得咁好，好到燒緊埋黎，我就一野買起你，勝在我有錢嘛！呵呵~~」巨媒就咁成為歷史。

買方新聞公佈

拜拜與再見

2005-04-11T01:11:00.000+08:00

近期看了一個數碼通刊登於報紙雜誌上的廣告，是有關新推出的三Ｇ服務。廣告的口號的「沒有拜拜，只有再見」。文字玩得十分過癮，圖片也配合得很到位。在整輯數碼通三Ｇ的宣傳廣告中，我最喜歡這個。

數碼通三Ｇ宣傳廣告

又就黎中獎?

2005-04-11T00:48:00.000+08:00

一次又一次咁收到《讀者文摘》既「重要特急信件」，內容係關於我好幸運咁抽中成為佢地既目標客戶，過五關斬六將後已經到左最後幾關，只要訂佢地既刊物，就可以玩埋最後幾關，贏取名車等豐富獎品！

小學時，我真係以為自己好好彩，落足嘴頭叫屋企人試訂一年，一年過左，佢仲係話我好好彩，差幾關就贏左架車，叫我續訂一年，心想：一年又一年，都唔知仲有幾多個一年先真係可以拎部名車返屋企！

到最後我都係冇續訂。雖然我果陣多數都係睇佢入面Ｄ笑話，但呢本野都算係我閱讀長篇文章既啟蒙老師。

車匙信件

Cannon CanoScan 9950F

2005-04-11T00:16:00.000+08:00

近排買左個掃描器，創作真係方便左好多，睇到有Ｄ咩野有趣既文章或者繪圖就即刻掃描入電腦度，做返個記錄。

最重要都係呢部掃瞄器可以一次過掃三十張菲林，品質仲係出奇咁好，難怪佳能出左呢舊野之後都摺埋晒自己所有既純菲林掃描器！

好耐之前影落既一張黑白相。

東方日報（壹）

2005-03-07T00:11:00.000+08:00

起小學開始就有睇報紙既習慣，每日唔睇過報紙硬係有Ｄ唔安樂。果陣時係起學校訂《星島日報》，一放學返屋企做完功課就開始睇，睇到食晚飯先肯停。每篷禮拜六，屋企人都會買一份《東方日報》返黎，果陣我開始發覺兩份報紙寫新聞既手法好唔同。

上左中學，轉睇《明報》加《東方》，發覺呢兩份報紙既寫作手法更加唔同，不過我都係鍾意睇《東方》多Ｄ，因為佢有好多新聞《明報》都係冇既，仲有就係東方》既政經專欄也更合我口味。奈何《東方》有一樣野我最憎既，就係佢既版面設計，難聽Ｄ講，真係越整越差、越改越核突！

先講《東方》新聞既標題，好鍾意加邊加厚，整到一隻字有幾層顏色包住，睇落真係好老套。雖然可能有人鍾意呢Ｄ五彩繽紛既標題，不過呢Ｄ咁既貨色，實難登大雅之堂！顏色吸引，應該係在相片下功夫，眼見《紐約時報》、《泰晤士報》等大報，都係版面清晰，圖表易明，圖片到位，就連《東方》對手《蘋果》，不論用色、版面、圖片等都好過佢好多！明報以前版面都唔係咁好，不過經過幾次改版後，而家都順眼左好多，星島既都係，俾何柱國收購左後，版面更加簡潔，印刷質素也提昇了不少。本人更覺得《星島》的版面是香港中文報紙內最好的一份。

《東方》貴為香港最高銷量報紙，新聞品質當然重要，但係圖片質素、版面設計、用色統一等，都係好重要的，有好既新聞品質當然可以起市民心目中加分，但係其他地方做得到唔好，分數被扣也是平常事。

將音樂融入生活

2005-02-22T21:46:00.001+08:00

用了iPod一段日子，開始覺得它的存在真的為我生活品味帶來了改變，在進行不同事情的時侯選用不同的樂曲作為背景音樂可以帶來意想不到的效果！

例如當我正在趕返學的時候，一邊聽著Aselin Debison的MoonlightShadow一邊跑去火車站，她唱的歌還未唱完便已經到達，疲勞感也比以前減輕不少！搭火車時我會聽的音樂可就多了，任何舒服輕鬆的作品也不會放過，例如Art Garfunkel的MorningHasBroken，喜多郎的Dance OfSarasvati，Contiti的Cora，Yanni的Reflectionof Passion和OnceUponaTime等，都是不錯的選擇。

除了以上的例子，當然還有很多場合可以用其他不同的曲目做自己的背景音樂。天氣、心情、環境，加上不同的背境音樂，的確可以將平日沉悶乏味之例行事情變得有感覺有共鳴。

靚女的無辜

2005-02-22T02:05:00.000+08:00

一個人生得靚當然係好，簡直就係上天俾福，可遇不可求！但係現今呢個世代，生得靚未必一定著數晒，往往相貌平平既上晒岸都未到標青果D，何解？

起小說加電視加電影加埋由細到大對靚女既誤解下，男仔已經覺得靚女一定係斯文大方加冰雪聰明加溫柔體貼加聲音甜美！見到靚女既第一眼已經可以幫佢（她）譜出成世人優美既樂章，但係一相處落，就會發覺原來另一半並唔係幻想中既白雪公主，腦海中既灰姑娘！佢只係一個好平常平時會發下脾氣平日會鬧下情緒
既香港製造。

好了，童話破滅了，緣分也盡了，男的覺得自己被騙，被那女的騙了，但那女的連自己錯在那裡也不知道，因為她跟本沒錯，錯的就只是世上大多數故事的女主角都是美麗的！也許，那些作者就是將現實不可能存在的女孩，寫進故事裡來滿足自己現實生活的渴望吧！

萊卡相機

2005-02-20T16:13:00.000+08:00

早前行過相機舖，被一部黑色的相機吸引著，它就是萊卡（Leica）的M7，萊卡相機一向飲譽於相機界，是每個影相人的DreamCamera，而M7 雖是一部電子相機，但起冇電既情況下一樣可以操作。M7的極地環境操作性能雖不及同系的 MP，但加進了電子輔助的M7，於隨拍方面更得心應手。

價錢方面有人認為是太高了，二萬多元，但它的壽命通常有五十年之久，真係影到我老年柏金遜按唔到快門佢都未爛！用呢個價錢可以買一部至少用半個世紀既相機，計落都係幾超值的。而萊卡方面亦作出保證：所有相機零件至少三十年有貨！所以買左都唔駛驚將來冇地方維修。

咁好既相機，點解我都未買？
原因好簡單：我都冇咁多錢！

塞！

2005-01-23T18:43:00.000+08:00

前幾日因為廁所洗面盆去水位塞左，所以母親大人就起樓下電器鋪買左支通渠液返黎諗住通通佢喇。

講起樓下間電器鋪就犀利喇，佢唔單只有普通電器買賣，就連花灑、廁所板一類家庭用品都買埋，因為佢價錢俾豐澤仲要平，薄利多銷嘛，所以都好好生意，連隔離兒童樂園都俾佢食埋，打通兩間鋪用黎賣燈飾同埋化學用品—遮係通渠液一類的產品。

呢支通渠液來頭都唔小，雖則只賣九蚊，但功效方面簡直嚇你一跳：能迅速溶解頑固油塊（正常丫）、頭髮（嘩！）、脂肪（瘦身？）、皮膚（嘩！嘩！）、肉團（嘩！嘩！嘩！）及骨頭（嘩！嘩！嘩！嘩！）等。

倒左成支落去，渠內發出既聲音既似慘叫，又似咆吼！正當我聽得如癡如醉既時候，渠口突然冒煙，眼見勢色不對，即刻後退三分，身都未停定，通渠液已開始回湧，從渠口噴出，今次走得快，凈係揩到條褲，冇化左我去都算係好彩咯！

無去一切的必然

2004-12-09T01:29:00.000+08:00

政府賤賣「紅灣」給地產商，夾心階層繼續居者冇其屋。算了，只怪「紅灣」建於不屬於它的地方，無敵海景看來只是有錢人與中年男人的專利。試想想，如果紅灣」是座落於公共屋村之內，真係送俾地產商佢地都未必要！

好喇，而家話拆喇，地產商為左等小市民唔好咁嬲，竟然話佢地會用「環保拆樓」，無塵無聲無加冇乜廢料，眾所周知，邊有人拆樓係唔想棟樓快D塌，拿拿臨臨咁移平撻地再起其他野。而家地產商就好似做大戲咁，話同棟樓慢慢磨咁就更加激起民憤，第日黑社會收靚時可以有樣學樣咁話佢地將會採用「無痛劈友」，家長可以放心！

*寫於橙、魚、蛋等被發現全都是假的之後。

靚俾全世界睇

2004-10-22T13:42:00.000+08:00

早前為訊息工程學會設計單行紙，出來的製成品，本人很滿意。其實所有本人設計之物品，我也很滿意，因為有些微不滿的，就是過不了自己那一關，連自己也不能接受的頹貨，我是絕不會交給別人的。

但問題是，我覺得靚的東西，大多數人也有同感嗎？跟據過往的事實，很多人也會對我的設計感到厭惡。其實要知道甚麼是他們想要的並不難，由他們的言行、衣著、文具、髮型中便可知一二，設計一些他門共同喜愛的東西並不困難，但我放棄了那麼做。

原因是，各人的品味不同，如果那樣東西他們都喜愛的，它就是沒有品味、太傭俗了！我寧願為他人設計有感通才會覺得靚的「茶」，也不屑為人設計通俗大路沒有內函的「糖」。茶喝久了越覺它味中有味，甘香清醇；糖吃多了只覺它萬變不離其中。

*寫於發現有紫番薯也是染色之後

係你呀，香港寬頻！

2004-09-21T01:11:00.000+08:00

香港寬頻早前起我屋企留下既大堂度裝左部寬頻電視，每日廿四小時不停的播新聞，呢朝一出，威力就大喇，大堂等升降機既人等到唔肯入去，繼續企起度睇。有好多晚晚都俾有線電視拍門硬銷但係成世仔都不知收費電視為可物既人，而家終於有幸一睹風采。睇完話正果Ｄ人，仲心郁郁話想裝返個起屋企添！

今舖香港寬頻真係嬴晒。有線電視起公屋硬銷左咁多年，都冇用過呢絛橋，淨係識起時代廣場同埋海運門口安裝大電視，我打死都唔信Ｄ人會起果度睇完會心郁，去得果度都唔會無端端有「裝返個起屋企」既感覺啦，最多都係用黎消磨時間。

香港寬頻呢招，就好似超級市場市場入面Ｄ試食攤檔咁，食你唔飽但係又吊到你癮，真係高招、真係佩服！

薑汁撞奶

2004-09-18T02:06:00.000+08:00

最近愛上了吃薑汁撞奶，覺得它是一個神奇的甜品，看似平常的把薑汁和牛奶混和，使它甜中帶辣既香又滑，但背後的科學原理到現在還未有確切的定案。總的來說，科學家們相信主要是牛奶裏的酪蛋白及鈣等成分與薑汁中的薑醇和薑烯及薑蛋白酶等聚合沈降有關。

製作薑汁撞奶絕對是一件易學難精的事，既沒有標準的份量，也沒有不失敗的食譜。成功與否全部取決於累積經驗和不斷嘗試。或者是我夠運的關係，第一次整便成功了，可惜家姐和爸爸對這「變態」的奶並不欣賞。可能好多人也只示薑汁撞奶為普通的甜品，但它的益處，實遠超於其成本。薑汁撞奶能驅風散寒、化痰
、增強血液循環、保持體溫、防止感冒、活血、通便、提高抵抗力，據說對剛剛生産的産婦有較好的調理作用。

薑汁撞奶製作方法極之簡單，先將薑磨爛取汁（一湯羹），把一碗牛奶（一定要係全脂）煲至八十度（煲邊開始有泡），再將牛奶沖入再有薑汁的碗內，等三至五分鐘即成。各位如有興趣，不防一試。

班長的重要性

2004-09-14T00:43:00.000+08:00

班長在班中有著領導同學、維持秩序、協助有需要同學等職責，傳統教育觀念，班長當然是要選一位品學兼優，性格溫文的「讀書人」來當，因為這樣才能對班中的搗蛋起阻嚇作用，令他們望而生畏。但眾所周知，這樣的傳統結果只有一個：乖的學生會和班長連成一線，搗蛋的就繼續搗蛋，事事和班長作對。我一直也
疑惑，為何老師們不選一個班上最曳的來做班長，這樣做的好處有三：

一、班長的職責和他的本性起住一種極大的衝突，他們會因此而對自己的行為有所收歛，從此班上至少減了一個搗蛋的。

二、因為他做了班長，連帶和他搗蛋的死黨也會因為俾面他而收歛，效果俾那「品學兼優」叫他們肅靜來得容易十萬倍！

三、班上秩序因此大大改善，老師們教書也可以更有效率，一舉多得。

選班長如此，選議員亦然。

這個版的圖像

2004-09-13T01:35:00.000+08:00

突然發現這幅照片，應該係家姐去歐洲旅行時拍的，覺得隻羊食草個樣好好笑，所以就用左佢黎做呢個網上日誌既圖像，有Ｄ羊唔肚餓搵草食，點會無端端低頭既感覺。

七一的可持續發展

2004-09-13T00:20:00.000+08:00

七一Ｄ人根本就唔係個個都話要普選、倒董，佢地都係反映佢地想要既，俾我做政府，就將七一定為遊行日，等Ｄ人可以起果日上街表達下佢地既民意，可以拉橫額話倒董，亦都可以舉牌話支持董生，愛國愛港。等政府同埋政黨起果日真正睇到我地市民既意願同埋訴求。

我對現今教育的看法

2004-09-13T00:18:00.000+08:00

老師有兩種，分別是：識教書同埋唔識教書。
學生有兩類，分別是：肯讀書同埋唔肯讀書。
在現今的教育制度下，兩者之間並沒有關連。